SHILLONG: Dingtang dingtang Department-rangni nangdapgipa aro niksamsogijagipa korosrangna jakkalna man·na gita State Cabinet, mijalo Contingency Fund of Meghalaya (Amendment) Bill 2021-ko ra·chakaha.
Cabinet tom·ani ja·mano Chief Minister, Conrad Sangma agana je Cabinet tom·anio, Meghalaya Contingency Fund-koba kror 305 oniko kror 505-ona bariataha.
Ia fund ba tangka paisarangko, Governor-ni palo Meghalaya Sorkarini Special Secretary/ Secretary, Finance Department-o jak ra·anggen.
Unomitingo, taridapgimin Meghalaya Human Rights Commission Rules 2014-koba Cabinet-o ra·chakaha. Ia rules ba Ain-rangko Meghalaya Human Rights Commission Amendment Rules, 2021 ine minggen.
Iarang baksana, Meghalaya-o BHARATNET Project-ko ta·rake jakkalna man·na gita, Department of Telecommunication, GoI, IT & Communications Department, GoM aro BBNL-ni soi ka·gipa taridapgimin Tripartite MoU-koba Cabinet-o ra·chakaha.
Meghalaya State Consumer Dispute Redressal Commission aro District Consumer Disputes Redressal Commissions-ni President-ni post-na mande seokna gita panel-na minggimin manderangni bimingrangko Cabinet ra·chakaha.
Major (Dr.) K. I. Singh-ko Zila Sainik Welfare Officer dake kamo donangna gita uni service-ko gipin bilsi gittamna ra·doangna gita Cabinet ra·chakaha.
Iarang baksana, Meghalaya Medical Attendance Rules 1981-ko ra·galenba Meghalaya Medical Attendance Rules 2021-ko ra·gatchina de·e ra·bagipakoba Cabinet-o ra·chakaha.
