Shillong: Opposition-ni dilgipa, Dr. Mukul Sangma, State Chief Information Commissioner (SCIC)-ko kamo rakkianio nangana batpile somoiko jaroatenganina NPP-chi rikdilenggipa a·dok sorkariko matnange aganaha.
Uni matnange agan-parakatani gitade Meghalaya State Information Commission (MSIC)-o ia bilsini March jao gitcham cheif secretary, PBO Warjri-ni kam ka·ani bilsi matchotani ja·manonin da·ona kingkingba SCIC-ko seoktaikujaenga.
“A·doko maiba namgnina miksongani gnang a·bachengatgimin ba rikgimin institution-rang gnang. Ian Right to Information Act, 2005-ni niamoniko dingtangmancha ma·ekate taridapgimin institution ong·achim.”
“Ia institution-chin a·dok sorkarini kamko ba sorkarini pilak program-rangko ba sorkariko challaienganio aro uandakgipa kamrangni bidingo manderangni u·i-ma·sirikpachina gita ra·gatgimin mingsa chol ong·paa,” ine Dr. Mukul, jean saksa niksenggipa gitcham Chief Minister ong·achim, ua mejal Sombar salo kobor ra·timgiparang baksa agangrikani somoio janapatjolaha.
Uni parakani gitade, RTI Act-ko a·dok sorkarini dingtang dingtang department-rango aro badiaba institution-rango maiba tik ong·gijani aro cha·bokani ba rusiani donggenchimode uarangko ma·sie ra·na man·a gita dingtangmancha on·gimin bil ong·a.
“An·ching pangnan sorkarini kamo aro dingtang dingtang a·bao bang·a cha·bokani aro kamo tik ong·gijani cholrang dongengako jegalna man·ja, maina uandakgipa namgijagipa kamrangko bon·atna man·chipja,” ine Dr. Mukul uni u·i-ma·sianiko parakaha.
Chief Minister gitchamni aganani gitade, a·doko bak rengsi dongpagipa manderang dingtang dingtang kamo tik ong·gijaniko ia law-chin nirikkie ra·na gita manderangna bilko on·a nangchongmota.
“Unigimin, an·ching ia act-o pangchake uandakgipa tik ong·gijagipa kamrangko nirikkie ra·china ramram manderangna bilko on·a nanga,” ineba ua agandapaha.
Uandake, SIC-ko kamo rakkiatanio a·dok sorkarini nangana batpile jaroataniko ma·sinan man·ja, a·dok sorkari maiko dakdame dongenga ineba opposition-ni dilgipa matnange sing·doataha.