A·doko game cha·giparangni neng·nikaniko sorkari nirokjaenga; MLA-rang matnanga

SHILLONG: Meghalaya a·dokoba COVID-19 giproroahani a·sel game ge·e cha·enggipa manderang neng·nikanirangko chagrongna nangtokengoba, a·dok sorkari game ge·e cha·giparangna maming dakchakanirangko on·jaenga ine Bristibar salo opposition Congress dolni MLA-rang, Assembly-o matnangtokaha.
Iani bidingo da·o ong·atenggipa Assembly-ni Autumn Session-o chanchirimdilangengon, a·doko game ge·e cha·giparangna sorkari, dakchakanirangko on·na ku·rachakahaoba batanggimin bilsisa atani gisepo maming dakchakanirangko on·jaengani a·sel game ge·e cha·enggipa manderang neng·bee janggi tangna nangtokenga ine Mawsynram-ni Congress MLA HM Shangpliang parakataha.
Batanggimin bilsisa atani gisepo sabisi giproroaniko champengna lockdown-rangko ra·gatani a·sel game ge·e cha·giparang bang·a neng·nikanirangko chagrongna nangahaoba sorkari uamangna maming dakchakanirangko on·na gisik nangjaha aro batesa game ge·e cha·giparangni, bostutangtangko palna sim·na ra·baani somoirangoba mitam police-rang, uamangko champenge neng·nikanirangko aro noksan ong·atanirangko on·skaaha ineba Shangpliang matnangataha.
A·doko game ge·e cha·giparangna, an·tangtangni game ge·e man·gipa bosturangko palchakna gita sorkari, nokrangko rike on·na ku·rachakahaoba da·alonan nokrangko rike on·kujaenga ine janapatengon, game ge·e cha·giparangni neng·nikanirangko chel·chakna gita dingtangmancha bilsio game ge·e cha·giparangnaba budget-o dingtang tangka paisarangko chamchina gita Congress MLA dabiangaha.
Shangpliang-ni janapatgipa kattarangna Ampati-ni Congress MLA Miani D Shira-ba chakpaaniko parakangengon, COVID-19 giproroengmiting somoio game ge·e cha·enggipa manderang, an·tangtangni bosturangko pala sim·anio bang·a neng·nikanirangko chagrongna nangtokaha aro me·su samjakrangkoba komia damrango palgalna gita nangtokaha ine an·tangni suk ong·gijaniko parakataha.
MLA-rangni sing·anirangna a·dokni Chief Minister Conrad K Sangma, aganchakaniko on·angengon, COVID giproroani a·sel a·doko songdongenggipa pilak manderangan neng·nikanirangko chagrongna nangaha indiba manderangni janggi tanganiko gadangko tangatpilna gita sorkari, economic task force-ko songe, dingtang dingtang kamrangko a·bachengattaiaha ine parakatskaaha.
Game ge·e cha·enggiparangni bosturangko salna gita sorkari, 1917 dolko jakkalaha aro ia dol, game ge·e cha·giparangoniko metric ton 750-mangni gita bosturangko chang 700 salanichi dakchakaniko on·na man·aha ineba Chief Minister parakataha.