SHILLONG: Biapna neng·nikaniko namatna man·ahaon South West Garo Hills a·jao Maternity & Child Hospital (MCH)-ko rikna a·bachenggnok ine Bristibar salo a·dokni Deputy Chief Minister Prestone Tynsong, Assembly-o parakataha.
Ia MCH hospital-ko Mahendraganj-o rikna manchianiko South West Garo Hills a·jani dingtang dingtang dolrang aro a·jao songdongenggipa manderang jegalenba, ia hospital-ko a·jani headquarter Ampati jolon rikchina dabitokengachim ine nikna man·a.
Ia MCH-ko rikani bidingo Mahendraganj-ni Congress MLA Dikkanchi D Shira-ni Assembly-o sing·anina aganchakaniko on·angengon, ia MCH-ko rikna gita gong kror 14 tangkarangko chame on·manaha ine Deputy Chief Minister aro Health & Family Welfare-ko jako ra·enggipa Minister Prestone Tynsong parakataha.
Ia hospital-ko rikna gita Chapahati songo acre 10-12-mangko on·gilmanahachim ineba Tynsong parakataha.
“Chinga ia a·ako jako ra·manaha aro ia hospital-ko ta·raken rikna jotton ka·gnok,” ine Deputy Chief Minister aganaha.
Iana skang, ia hospital-ko rikani bidingo Mahendraganj-ni MLA chanchirimdilangengon, da·o dipet sima ari jolo donggipa Community Health Centre, ia jolrango bi·sarangko aro an·o donggipa me·chikrangkode nirok sandina man·jaenga ine an·tangni suk ong·gijaniko parakangaha.
South West Garo Hills a·jao MCH hospital-ko rikna gita bilsi 4 bilsi 5-na skangan sorkari sanction ka·manahaona da·onan rikkujaenga ineba Shira, an·tangni suk ong·gijaniko parakataha.