TURA: A·chik a·songo donggipa a·kingrangko naljoke rakkina man·na gita aro A·chik a·songo sason ka·ani bewalrangko gimaatjana gita Bristibar salo All Garo Hills Federation Cooperative Multipurpose (AGHFCM) dolni gita A·king Nokmarangna aro Songat Nokmarangna on·gimin bilrangni gimin aro uamangni daitorangni bidingo agan-talataniko on·na gita dingtangmancha awareness program-ko Tikrikilla Alokdia songo ong·atangaha.
Ia program-ko ong·atanio AGHFCM-ni dilgiparang aro dingtang dingtang dilgiparangba Nokmarangna aganprakengon, Garo Hills-o aro mongsongbate a·kawe jolrango gipin biaprangoni manderang niam gri napsrukbae songdong a·chaanirang batroroengani a·sel Nokmarangna on·gimin bil aro cholrang gimaroroangengaha ine nikengani gimin Nokmarangko an·tangtangna on·gimin bil aro dakna nanggni kamrangko ma·sie ra·china gita didiangtokaha.
A·king Nokmarangan a·kingni nokgiparang ong·a aro ia a·kingrangko nirokgipara district council ong·a ine talataniko on·angengon, sorkari aro district council-ni on·enggipa cholrangko ra·e a·kingtangtangko tangatpiltaichina A·king Nokmarangko didiangaha.
A·kingtangtango songdongenggipa manderangko see rakkichina didiangengon, uni a·kingo badita sak gipin jatrang, banoni re·bae mai kamrangko ka·e cha·enga uarangkoba am·sandijringchina gita AGHFCM-ni dilgiparang, A·king Nokmarangko didiangaha.
“A·king Nokmarangan an·tangtangna on·gimin kamrangko kakketo ka·genchimode, ian Inner Line Permit (ILP)-ko ra·gataming apsan ong·gen aro A·chik a·songo mande rim·gittanganiko aro gipin jatrangni me·chik palbadinge cha·aniko komiatna dakchakgen,” ine AGHFCM-ni dilgiparang parakataha.
Ia program-ko ong·atanio Meghalaya Basin Development-ni official Judith Sangma-ba dongpae jinmana aganprakengon, A·chik a·songo gama ge·anirangko nambatatchina gita songni nokni manderangko didiangaha.
