SHILLONG: Ia bilsini gisepo Meghalaya a·dok gimikni dam 191 skulrangko namdapatna gita sorkari, gong kror 109 tangkarangko chame on·aha ine Sukrobar salo a·dokni Education Minister Lahkmen Rymbui parakataha.
Assembly-o Mawsynram-ni Congress MLA HM Shangpliang-ni sing·anina ia kattarangko Education Minister aganchakaha.
Lahkmen Rymbui-ni aganani gitade, a·dok gimiko donggipa sorkari skulrangko ia sorkarian niatchenggipa sorkari ong·aha.
Sorkarini namdapatna jako ra·enggipa dam 191 skulrangoni dam 10-de secondary aro higher secondary skulrang, dam 4-de upper primary skulrang aro dam 3-de lower primary skulrang ong·a ineba Education Minister aganaha.
“A·dokni scheme-oniko ra·enggipa gong kror 109 tangkarangchi ia skulrangna nokrangkosan rike on·aigija skulrango nangchongmotgipa dingtang dingtang bosturangkoba on·gen,” ine ua aganaha.
Nosto ong·e dongenggipa sorkari skul nokrangko tariningjaengani gimin Congress MLA-ni suk ong·gijaniko parakaton, classroom-rangko rikdapna gita Phlangwanroy government LP skulna gong lak 8.20-ko aro Lalpani LP sorkari skulna gong lak 10-ko sorkari chame on·aha ine Education Minister parakataha.
2018 bilsioni ia bilsiona kingking Mawsynram block-ni ning·o donggipa damgni sorkari LP skulrangna state scheme-ni ning·o gital skul nokrangko rikna gita sorkari ra·chakmanaha ineba Rymbui parakataha.