TURA: September jagimikna manienggipa Poshan Maah ba Nutrition Month-ni bak gita Central Agriculture University (CAU)-ni ning·o donggipa Tura-ni College of Community Science-oba, bi·sarangna aro an·o donggipa me·chikrangna nangchongmotgipa cha·anirangko tarie on·ani bidingo dake mesokangaha.
Ia program-ko Tura-ni samba jolo donggipa Edenbari songo Balkasin Self Help Group (SHG) aro Bluebel SHG-ni me·chikrangna ong·atangaha, jeon poha, green chapatti aro ladoo-rangko tarie mesokangaha.
Ia program-ko ong·atanio Community Science College-ni ning·o donggipa Food Science aro Nutrition department-ni Assistant Professor Natasha R Marak, namgipa cha·anirangko cha·rongna nangani gimin aganangaha.
Ia program-ko ong·atanio bite nanggipa pang 38 bol chararangkoba, SHG-ni me·chikrangna suale on·angjolaha.
