SHILLONG: Meghalaya a·doko dingtang dingtang dolrangni ra·gatchina dabienggipa Inner Line Permit (ILP)-ni bidingo Opposition Congress dolni membor-rang, NPP-chi dilenggipa MDA sorkariko matnange aganahani gimin iani bidingo MDA sorkariko jaksi otjachina a·dokni Chief Minister Conrad K Sangma, Opposition Congress dolni membor-rangko aganaha.
Chief Minister-ni parakatani gitade, gitcham Congress sorkarini somoion Meghalaya-o ILP-ko nangnikjaenga aro iani bidingo NGO-rang baksa agangrikjawa ine gitcham Chief Minister Mukul Sangma aganahachim aro da·o Congress dol, MDA sorkarikosa iani bidingo matnangna jotton ka·skaengachim.
“MUA sorkari, ILP-ko nangnikjaenga aro ILP-ni bidingo NGO-rang baksa agangrikjawa ine 2013 bilsini November 27 tariko gitcham chief minister an·tangan aganeba da·o ILP-ko ra·gatna gita kam ka·dilenggipa MDA sorkarikosa matnangskaenga,” ine Conrad parakataha.
Chief Minister-ni aganani gitade, MDA sorkarisa ILP-ni bidingo Assembly-o chanchirimdile resolution-ko pass ka·dilahachim aro da·oba iani bidingo ma·mong sorkari baksa agangrikengkuachim.
“MDA sorkarini iandakgipa kamrangan ILP-na gisiko nanganiko mesokani ong·enga, uni gimin ILP-ni bidingo chingko jak otnabe,” ine Sangma, Assembly-o aganaha.
