SHILLONG: Meghalaya a·doko kejur ge·aniko a·bachengna gita a·dok sorkario maming tik ka·a dongkuja ine talataniko on·angtaiaha.
Assembly-o MLA Mohendro Rapsang-ni sing·anina aganchakaniko on·angengon, ma·mong sorkarini tik ka·aniko aro niamrangko tarie on·aniko Forest department sengengkua indiba da·o dipet a·doko kejur ge·aniko a·bachengna maming ja·ku de·anirang dongkuja ine a·dokni Forest & Environment Minister James K Sangma parakataha.
Ge·a gamani kamrangkode Agriculture aro Horticulture department-rangsa jako ra·e ka·gipa ong·ani gimin iani bidingo sing·aniko Agriculture ba Horticulture minister-rangosa sing·na nangachim ineba James aganaha.
Forest Minister-ni parakatani gitade, da·o dipet Meghalaya a·doko kejur ge·aniko a·bachengatani bidingo a·dok sorkari, ma·mong sorkarioniko maming u·iataniko man·soa dongkuja aro uamang, ma·mong sorkarini u·iatanina sengkuenga.
“Chinga a·dokna simsakgiparang ong·ani gimin a·dokna nisianiko ra·banagipa ja·kurangko maming saloba de·jawa,” ine Sangma aganaha.