TURA: Kamoniko ra·gala man·gipa Non-Gazetted Employees Association (NGEA)-ni dilgiparangko kamo donatpilchina dabie, Sombar sal dipet Garo Hills Autonomous District Council (GHADC)-o kam ka·enggiparang, kamtangtangko ka·gija jingjengatna ka·mikkenatengon, kam ka·anio maming champenganirang dongjawa ine GHADC-ni dilgiparang parakatskaaha.
“September-ni 20 tarik Sombar sal dipet GHADC-o kam ka·enggipa mitam manderang, kamrangko ka·gija jingjengatgen ine songbadrango seaniko GHADC-ni dilgiparang knasona man·aha indiba GHADC office-ko pangna dakrongbaenga gitan kamko ka·angaigen aro kulie donaigen ine chinga jinmana u·iatna nangnikenga,” ine GHADC-ni Joint Secretary, seachi parakataha.
GHADC-o kam ka·enggiparangna gital pay scale-o dormaharangko on·china aro kamoniko ra·gala man·gipa dilgiparangko kamo rakkipilchina dabie, NGEA-ni membor-rang, Tura jillani badiaba badiaba biaprango poster-rangko tape dontokahachim.
GHADC-o Executive Committee-ni kosako kamrangko ka·ahani gimin re·anggipa August jaosan, Non Gazetted Employees Association (NGEA)-ni mitam dilgiparangko dikdiksana kam ra·galatenba, president-ni kamkode chu·gimik bon·atsrangahachim.
NGEA-ni president Johny Senora Arengh, jean GHADC-ni Taxation department-o LDA-ni kamko ka·engachim, uni kamko Executive Committee, chu·gimik bon·atsrangaha aro NGEA-ni gipin dilgiparang, chong·motan NGEA-ni secretary Brithen M Sangma, joint secretary Flaming B Marak, adviser Balseng M Sangma, sakgipin adviser Augustbell R Marak aro gipinrangko suspend ka·skaahachim.
Indake ong·engon, kamoniko ra·gala man·gipa dilgiparangko kamo donpilchina aro da·o on·na sienggipa jabrini dormahako gital pay scale-o on·china gita NGEA dabiskaengachim.
GHADC-ni Deputy CEM Nikman Ch Marak-ni parakatani gitade, Transport aro Forest tax-rangoniko gong kror 20 tangkarangko a·dok sorkarioniko man·engani gimin GHADC-o kam ka·enggiparang jabrini dormaharangko on·na miksongengachim.
Ra·gala man·gipa NGEA-ni dilgiparangko kamo donpilchina dabie kam dontongatna ka·mikkenata
Date:
Share post:
