TURA: Agia-Medhipara-Phulbari-Tura (AMPT) aro Garobadha-oni Ampati aro Mahendraganj gita Dalu-ona dakanggipa ramarang namroroangjaengahani gimin adita salrangna skang, Garobadha-ni A·chik Youth Welfare Organisation (AYWO), Meghalaya a·dokni Chief Minister Conrad K Sangma-na sedoataha.
Ia ramarangni bidingo a·dokni Chief Minister-na sedoatengon, ia rama dilgniara West Garo Hills aro South West Garo Hills a·jao songdongenggipa manderangni mongsonggipa re·a doani chol ong·achim indiba ia rama gita ro·ong aro ma·manti bosturangko Bangladesh a·songona salruraengani a·sel ia ramarang namen nosto ong·atako man·engaha ine AYWO Garobadha regional branch-ni dilgiparang parakataha.
Ia ramarang gita dal·dalgipa truck garirang, salantian bosturangko salruraengani a·sel jolo songdongenggipa manderang aro mongsongbate skul, college-rangchi re·ruraenggipa chatro chatrirang neng·nikanirangko man·na nangtokengaha ineba AYWO parakataha.
AMPT ramani bidingo janapatengon, ia ramako name rakkigenchim ong·ode ia rama gitan Assam a·doko donggipa Agia-oni Tura-ona re·rurana aro ma·manti bading chiwalani kamrangko ka·na nambatgipa chol ong·genchim ine AYWO Garobadha regional branch parakataha.
“Ia AMPT rama gitan dingtang dingtang bading chiwalani kamrangko ka·e a·dokna aro GHADC-na kajinarangko man·dapgenchim indiba ia ramani obosta namsrangjaengahani a·selan re·ruraenggipa manderang bang·a neng·nikanirangko chagrongna nangtokengaha,” ine AYWO Garobadha branch-ni dilgiparang parakataha.
Ampati aro Mahendraganj gita Garobadha-oni Dalu-ona dakanggipa ramani gimin janapatskaengon, ia rama gitan ma·manti bosturangko Bangladesh a·songona salruraengani a·sel da·o rama jol gimikon a·kolrara dakakosa nikna man·engaha ine AYWO parakataha. Ia ramako da·onin name rakkijagenchimode mikkangchi ia ramaba AMPT rama gitan apsan ong·gnok ineba AYWO Garobadha branch parakataha.
Ia ramarang gita dal·dalgipa truck garirangni re·rurarongengani a·sel ramarangsan nosto ka·ako man·enga ong·ja indiba ia rama gita ja·achi re·ruraenggipa manderangnaba kenchakna nangani ong·enga ineba AYWO parakataha aro Bangladesh a·songona ma·manti bostu salruraenggipa garirangna dingtang cholko sandichina gita a·dokni Chief Minister-ko didiataha.