TURA: Re·anggipa Mongolbar walo, West Garo Hills a·jani police-rang, kg 6.770 ong·gipa ganja baksa mande saksako Phulbari joloniko rim·na man·aha.
West Garo Hills a·jani Superintendent of Police (SP) Vivekanand Singh-ni u·iatani gitade, Phulbari jolrango ganja badinggiparangni gimin koborko man·soenba police-rang, Phulbari police station-ni ning·o donggipa Koilaghat jolni Nimalkata songo, ganja badinggiparangko am·sandion, bilsi 41 ong·gipa Saddiq Ali-ko Fozial Sk minggipa mandeni nokoniko kg 6.770 ong·gipa ganjarang baksa rim·na man·aha.
Ia nok nokgipa an·tangni bagano ganjarango ge·enga ineba police-rang nikna man·aha.
“Ganja ge·aniara niamni kosako re·ani gita ong·ani gimin chinga ia nok nokgipani kosakoba nanga gita ja·kurangko de·enga. Iani bidingo mokordomako ka·enba chinga ning·tue sandianirangko dakengkua,” ine West Garo Hills a·jani SP parakataha.
Banoba ganja badinganirangko ba ganja bagan dakanirangko nikgenchimode police-rangna u·iatchina gitaba Singh didiataha.
“Kobor on·timgipa mandeni bimingko chinga jinmana parakjawa aro ua mandena nanga gita boksisko on·gen,” ine SP parakataha.
