TURA: Garo Hills-ni dambonga a·jarango COVID-19-na tika su·anirangko nipilna gita Budbar salo, Meghalaya a·dokni Chief Secretary MS Rao, a·ja dambongani Deputy Commissioner-rang baksa Tura Circuit House-o tom·aniko ong·atangaha.
Garo Hills-ni dambonga a·jarango COVID-19-na tika su·aniko nipilangengon, donsogimin nisanko chu·sokatna gita rakbee kamrangko ka·engani gimin a·dokni Chief Secretary, Garo Hills-ni medical officer-rangko aro COVID-19-ko warachakna kam ka·enggipa manderangko mittelpilangaha.
Meghalaya a·doko chu·onga gitan tikarang donggenchimoba a·dok gimiko tika su·anirang da·o dipet nangnika gita ong·kujaenga ineba ua an·tangni suk ong·gijaniko parakangaha.
Songadam nokadamrango manderang, COVID tikani bidingo ma·sisretengani a·sel tikarangko su·e ra·na gong·tokjaenga ine janapatengon, tika su·chakgipa centre-rangona re·baenggipa mande sakantikon tika su·e on·china gita Chief Secretary didiangaha.
Meghalaya a·doko Aadhar-na biming segataniko nipilangskaengon, a·songni gipin a·dokrang baksa tosusae nigenchimode Meghalaya-o Aadhar-na biming segatani namen komibatenga ine Chief Secretary parakataha.
Ia tom·anio Health department-ni official-rangba, COVID-na tika su·anirango chagrongna nangenggipa neng·nikanirangko aro tika su·aniko nambatatna ja·ku de·anirangko Chief Secretary-na agan-talate on·angskaaha.
Ia tom·anio Health official-rangni parakatani gitade, da·o dipet Garo Hills-o COVID-na tika su·ani South West Garo Hills a·jao 74.0% ong·e nambatgipa ong·enga aro West Garo Hills-o 59% ong·e gnigipa ong·skaenga.
April jaoni September jaona COVID-19-ko warachakna gita Garo Hills gimikna gong 78,17,288/- tangkarangko chamataha ineba ia tom·anio official-rang parakataha.
Da·o dipet Garo Hills gimiko COVID man·e sigiparang sak 118 gapengaha ineba official-rang parakataha.
Meghalaya a·dokni Chief Secretary MS Rao, bakan kamtangoni neng·takna siengahani gimin ia tom·anio Garo Hills-ni official-rang, dingtangmancha una mande ra·pilskaanikoba dakangaha.
Iana skang, West Garo Hills a·jani Deputy Commissioner in-charge CN Sangma, rimchaksoani kattarangko aganangaha.
