TURA: Meghalaya sorkarini ge·etanio pangchake North Garo Hills a·jaoba COVID-19-ko warachakna dongimin adita niamrangko dingtangataha ine North Garo Hills a·jani District Magistrate u·iataha.
District Magistrate-ni u·iatani gitade, a·dok sorkari aro Health department-ni dongimin niamrango pangchake Border Haat-rangko kulipiltaina on·engaha indiba ia Haat ba bazar-rangko kuliengon, niamrangko raken ja·rikna nanggen.
Education department-ni dongimin niamrango pangchake aro Deputy Commissioner-oniko permission ra·chengenba, North Garo Hills a·jao donggipa college/Institute hostel-rangkoba kulipiltaina on·engaha ine District Magistrate parakataha.
Mande sianirango tom·na dongimin niamni gimin janapatengon, da·o mande sianirangoba sak 50-na batgija manderangna tom·na man·gnok ine District Magistrate u·iataha.
Olakkiram nokrangni a·palo bia ka·anirangna dongimin niamrangni gimin janapatskaengon, bangbang dakgipa ba biap apalgipa nokrango bakgittamoni baksa indiba sak 100-na batgija manderang tom·na man·gen aro manderangni nokrangode sak 50-na batgija manderang tom·na man·gnok ine District Magistrate u·iataha.
Pilak biaprangon saksa sakgipinoni feet 5 chel·tanggrike dongchina aro COVID-19-ni pilak niamrangkon ja·rikchina gitaba District Magistrate u·iataha.
