TURA: Re·anggipa September-ni 22 tariko Garo Hills Autonomous District Council (GHADC)-ni chief executive membor (CEM) Benedic R Marak-ko uni office-ona grongna re·angani somoio ua Garoland State Movement Committee (GSMC) Pedaldoba regional unit-ni chairman aro Garo Students Union (GSU) Raksamgre western zone (west)-ni general secretary-ko kragija kattarangchi agane watataha ine matnangataha.
GSMC Pedaldoba regional unit-ni chairman Rimjen Ch Sangma aro GSU Raksamgre western zone (west)-ni general secretary Tengroang R Marak-ni kobor setimgiparangna parakatani gitade, Raksamgre jolrango nangenggipa dingtang dingtang kamrangni bidingo agangrikna gita uamang, September-ni 22 tariko GHADC office-ona re·ange CEM-ni personal secretary-o permission-ko ra·chengenba, CEM-ko grongna uni office chamber-ona re·angahachim. Indake ong·genchimoba, uamangni office ning·chi napangon, GHADC-ni CEM, uamangko rake agansoenba, uamang baksa agangrikna uo somoi dongja ine agane an·tangni office-oni ong·kate kataha.
“Benedic Marak, Raksamgre constituency-o seokako man·gipa MLA aro MDC-ba ong·achim indiba ua constituency-tangni nanganirangni gimin agangrikna jechakaha. Ian uni Raksamgre constituency-ni manderangna simsakgijaniko mesokani ong·aha. Chinga Raksamgre jolni manderang ong·e uni kamna namen gisik saaha aro uni kamko raken jegalenga,” ine GSMC aro GSU-ni dilgiparang parakataha.
