SHILLONG: Congress Legislature Party (CLP) aro Opposition dolni dilgipa Mukul Sangma, Trinamool Congress (TMC)-o napna gita TMC-ni dilgiparang baksa agangrikea ine agananiko raken jegalataha aro ua pangnan Congress dolo donge doltangko bilakbatatna gitasa jotton ka·enga ine talataniko on·angaha.
Da·o dipet ua an·tangko chel·e dongnasa jotton ka·enga aro phone ka·anirangkoba ra·chakna nangnikjaenga ine janapatengon, somoi ong·ahaon ua Delhi-ona re·ange All India Congress Committee (AICC)-ni dal·batgiparang baksa agangrikegen ine Sangma parakataha.
Sangma-ni aganani gitade, Congress dolni ning·o meligrikgijanirangko namatna gita ua nangnikenga aro dolni gisepon kamrangko namdapatchina ua AICC-ni dilgiparangko didigen.
Dingtang dingtang dolni dilgiparang uko an·tangtangni dolrango nangnikenga ine sing·on, Meghalaya a·dok aro gipin biaprangoba ua gipin dolrangni dilgiparang baksa meligipa ong·a ine CLP-ni dilgipa parakataha.
Meghalaya a·doko songdongenggipa dingtang dingtang jatrangni gisepo ku·cholsan ong·ani dongna gita dilgiparang an·tangtangan daitoko jako ra·na nanga ineba Sangma aganaha.
Adita salrangna skang, a·dokni gitcham Chief Minister aro CLP-ni dilgipa Mukul Sangma, Kolkata-ona re·ange TMC-ni dilgiparang baksa agangrikaha ine songbadrango seaniko nikna man·ahachim. Indake ong·genchimoba, iandake kobor on·aniko Dr Sangma an·tangba aro Congress dolni dilgiparangba jegalatskaaha.
