SHILLONG: Budbar saloni Bristibar salona konta 24-ni gisepo Meghalaya a·dok gimiko sak 263 manderang COVID-19 man·daptaiaha aro apsan salon mande saksa a·doko COVID man·e siangskaaha.
Konta 24-ni gisepo COVID-19 man·dapgipa sak 263 manderangko channe da·o Meghalaya a·dok gimiko COVID-19 man·e dongenggiparang gimik sak 1968 gapaha aro ia apsan salon mande saksa COVID-19 man·e siangdaptaiahani gimin a·dok gimiko COVID man·e sianggiparangara gimik sak 1386 gapskaengaha.
Konta 24-ni gisepo COVID man·gipa sak 263 manderangoni, sak 2-de East Garo Hills-o, sak 1-de East Jaintia Hills-o, sak 68-de East Khasi Hills-o, sak 89-de Ri Bhoi a·jao, sak 16-de South West Khasi Hills-o, sak 5-de West Garo Hills-o, sak 69-de West Khasi Hills-o aro sak 13-de West Jaintia Hills a·jao ong·a.
Salsani gisepo COVID man·e sianggipa mande sak 1-de East Khasi Hills a·jao ong·a.
Ia apsan salon gimik sak 162 manderangde Meghalaya a·dokni dingtang dingtang biaprango COVID-19-oni nampilskana man·aha aro uandaken ia COVID-oni nampilgiparangba gimik sak 76,892 gapskaengaha.
