TURA: Adita salrangna skang, Williamnagar-ni Loyola skulo boltong ga·akdapa man·e sianggipa chatrona Williamnagar jolo songdongenggipa manderang, Candle Light Service-ko ong·ate mande ra·pilskaaniko dakangaha.
Re·anggipa Mongolbar salo, Loyola skulo principal-ni ge·etani gimin adita sak chatrorang, skulni kal·chakramo dane donenggipa boltongrangko gipin biapona apjitatengmiting somoio bilsi 14 ong·gipa Cherian Bimik M Sangma, boltong ga·akdapa man·e siangna gita nangahachim.
Ia a·sel ong·ani ja·mano ia skulni principal Father Melwyn Fernandes-ko North East-ni Jesuit Missionary-rang, kamoniko dontongatahachim.
Iandake skulo poraienggipa bi·sarangko rakgipa kamrangko ka·atahani gimin bang·a manderangan aro dingtang dingtang dolrangba ia skulni dilgiparangko raken jegalatahachim.
Sianggipa Cherian-ni manggisiko gope galna gita uni atchiram Rongjeng songona ra·angaha indiba Williamnagar-o songdongenggipa manderangba ia a·selko jegalna aro sianggipa me·a bi·sani nokdangna bakrimaniko mesokna gita Budbar attamo dingtangmancha mombatirangko so·e jinma re·jomaniko aro bi·rimanirangko dakangaha.
Jinma tom·bimonge re·jomanio dingtang dingtang skul aro college-o poraienggipa chatro chatrirang, dingtang dingtang dolrang aro Williamnagar jolo songdongenggipa ritchani ritcha manderang bakko ra·angtokaha.
