TURA: Chokpot block-ni Rongrakgre songo songgipa Jio tower-o network-ko bilake watjaengani a·sel ia jolrango Jio network-ko jakkalenggipa manderang neng·nikanirangko chagrongna nangtokenga ine Garo Students Union (GSU) Silkigre unit parakatenba, jolo songdongenggipa manderangni namgnina Jio network-ko nambate watchina Jio company-ni official-rangko didiataha.
GSU Silkigre unit-ni general secretary Chingkam Ch Sangma-ni parakatani gitade, Rongrakgre baksana Tengkigre aro Silkigre songrango songgipa mobile tower-rangba network-rangko bilake watjaengani a·sel bang·bata songrangon manderang internet-rangko name man·tokjaenga aro uandaken dingtang dingtang kamko ka·enggiparang aro skulrango poraienggipa chatro chatrirangba, online gita class-rangko ra·anio neng·nikanirangko man·tokna nangenga.
“Ia sal somoirango sabisirangni giproroaniko champengna gita bang·bata skulrangon mitam class-rangkode internet gitasa class aro porikkarangko ra·na nangenga indiba ia jolrango internet-rangko name man·jaengani a·sel class aro porikkarangko sena nangenggipa chatro chatrirang neng·nikanirangko chagrongna nangtokenga,” ine GSU Silkigre unit-ni general secretary parakatenba, ia songrango donggipa mobile tower-rango network-rangko bilakbate watchina official-rangko didiataha.
