Chu·sokanggipa a·dokni Football club-rangna sorkari tangka paisarangko on·gen

SHILLONG: Meghalaya a·doko bang·bata football club ba robol kal·gipa dolrangan tangka paisarangni a·sel tange rakkina man·jaengani gimin mikkangchi a·dokni football club-rangko tange rakkiangna gita sorkari, dingtang dingtang kal·susaanirango chu·sokgipa football club-rangna, tangka paisarangko on·e dakchakgen ine Sukrobar salo, Meghalaya a·dokni Sports & Youth Affairs Minister Banteidor Lyngdoh parakataha.
Re·baenggipa October 4 tarikoni 25 tarikona Bangalore songjinmao ong·atenggipa Hero League Qualifiers-o bakko ra·na re·angenggipa Ryntih Sports & Cultural Club-na program-ko ong·atengmiting somoio a·dokni Sports Minister, ia kattarangko aganaha.
Sports Minister-ni aganani gitade, a·doko bang·bata football club-rangan tangka paisani gita neng·nikanirangko man·engani gimin sorkari, 2nd Division I-League-o kal·na qualify ong·gipa football club-rangna gong lak 10 ka·e, I-League-o kal·na qualify ong·gipa dolrangna gong lak 40 ka·e aro Indian Super League-o kal·na qualify ong·gipa football club-rangna gong kror 1 tangkarangko on·na tik ka·aha.
“Batanggimin bilsirango a·dokni bang·a football club-rangan tangka paisani gita neng·nikanirangko man·na nange tangkamna gita man·jaha aro sorkarini gitaba uamangna dakchakanirangko on·jahani a·sel football club-rang neng·nikanirangko chagrongna nangaha. Uni giminsa dingtang dingtang kal·susaanirango bakko ra·na chol man·enggipa dolrangna sorkari tangka paisani gita dakchakanirangko on·na tik ka·aha,” ine Lyngdoh aganaha.
JN Sports Complex-o dingtang dingtang cholrangko on·dape taridapna gita gong kror 34-ni tender-ko on·manaha ineba ia tom·anio a·dokni Sports Minister parakataha.
Robol kal·anikosan ong·aigija boxing, archery, athletics aro uandakgipa gipin kal·susaanirangkoba a·dok sorkari namdapatna kam ka·enga ineba ua aganaha.
Ia tom·anio ua Ryntih Sports & Cultural Club-ni membor-rangna agan-ku·pattianirangko on·angan baksana gong lak 2-ni cheque-koba on·angjolaha. Bakan lak 8 tangkarangko sorkari, ia club-na on·anggen ineba ua parakataha.