Sixth Schedule-o Village Council-ko ra·bajachina dabie W’nagar-o jingjengata

TURA: Constitution-ni Sixth Schedule-ko taridapna gita a·dok sorkarini recommendation ba ku·pattie on·anio Village Council-ko ra·bachina aganenga ine Garo Hills gimikon dingtang dingtang dolrang aro Nokmarangba jegaltokengon, Sukrobar salo Williamnagar-oba Sixth Schedule-o Village Council ra·gataniko jegale, dingtang dingtang dolrang, DC office mikkango asonge jingjengatangtokaha.
Ia jingjengataniko East Garo Hills a·jani Nokma Council dakdilangaha aro ia jingjengatanio FKJGP, GSU, ADE, AAYF, AYWO, FAF, SCF, GGU, Mothers Union aro uandakgipa gipin dolrangba bakko ra·angaha.
Ia jingjengatanio dingtang dingtang dolni dilgiparang, Sixth Schedule-ko taridapani gimin jinmana talate on·angengon, Sixth Schedule-ara a·brirango songdongenggipa Tribal-rangko chel·chakna on·gimin bilsa ong·a aro ia Sixth Schedule-ko taridapanio Village Council-ko ra·bagenchimode chengoni A·chikrangni ja·rikbaenggipa daka rikanirangko aro Nokma Sanerangna on·gimin bilrangko pe·ani gita ong·gen ine parakangaha.
Adita salrangna skangsan, Tura-oba Nokma Council-ni dilanichi ia Village Council-ko Sixth Schedule-o ra·gatna manchianiko jegale, dingtang dingtang dolrang aro jolo songdongenggipa manderang baksa jinma jegale, re·jomanirangko dakangahachim ine nikna man·a.