SHILLONG: MPCC-ni gital seoka man·gipa President Vincent Pala, party-ni ning·o golmal ong·ani bidingo agantalaniko on·atengon, “CLP dilgipa Dr Mukul Sangma, MPCC-na gital chief-ko songanio maming dakeba gisik saani dongja, indiba a·dokna gital president-o seokanio AICC-oni maming u·iataniko man·sojani giminsa on·tisa suk ong·jaha,” ine parakataha.
Da·odipet party-ni ning·o golmal ong·ani bidingo AICC-oni maming katta sokbaa dongkujaenga ineba Vincent Pala, Sonibar salo aganaha.
“Angko president songanina Mukul Sangma, maming dakeba neng·nikani dongja, indiba AICC-oni maming u·iatani dongjani giminsa suk ong·jaha,” ine Pala aganaha.
Indake ong·engon Dr Mukul Sangma, party-ni ning·o golmal ong·engani bidingo AICC-ni a·gipi dilgiparang baksa agangrikna chanchianiko talataha.
Congress-o dilgiparangni gisepo meligrikgijaniko nikna man·ani a·sel Dr Mukul Sangma-ko Congress-oni ong·kate gital party-o napskana ba gital party-ko bikotskanaba donga ine kobor jangbingbangaha, uandake Dr Sangma an·tangba, maming talataniko on·atjaha.
Indake ong·engon party-o golmal ong·aniko tom·tomatna Pala, AICC aro Dr Mukul Sangma baksaba agangrikgen ine aganaha.
“Angni kosako election chakatgiparangona re·angeba uamangoniko dakchakaniko bi·na man·ode, Dr Mukul Sangma baksa maina agangrikjawa. CLP dilgipako anga mande ra·bea, uan Garo Hills-oni saksa bilakgipa dilgipaba ong·a.”
Iarangni gisepon Pala, Sombar salo Garo Hills-ona wenange party-ni a·gipi dilgiparangko grongegen. MPCC president seoka man·e, Salseng Marak-ko gronggen.
Uandake party-ni a·gipi dilgipa Deborah Marak-ba party-ni sakgni dilgiparangkon meligrike apsan ong·e kam ka·china mol·molataha.
