TURA: East Gro Hills-ni skotong songjinma Williamnagar-o Rashtriya Poshan Maah 2021-ko gisik ra·e maniani bak gita mejal Sukrobar salo Nutrition run program-ko ong·ate bak ra·pagiparangko km 10 chel·e katsusaataha ine koborna u·iataha.
Ia program-ko District Programme Officer, ICDS Cell-ni gita District Administration, Williamnagar and District Sports Officer baksa apsan bakrime ong·atangaha.
Williamnagar-o ua program-ko East Garo Hills Deputy Commissioner office-oni katsusana a·bachengate km 5 chel·gipa Baija jolko jatchi done bakko ra·pagipa me·chik me·asa gimikko Chiso bibra-chipakna mikkange km 10 chel·aona kingking katsusaataha.
Uandake ua katsusaatanio bilsi 15 gapgipa aro uni kosako ong·gipa pante-me·tra aro gimik dakgipa bilsini gadango donggipa me·chik-me·asa pilakan ua nutritional run-o bak ra·e katsusatokaha ineba koborna u·iataha.
Indake ong·engon, ua katsusaaniko bilsi 15 ong·kuenggipa chadambe bi·sa Mr. Kanen M Sangma, skanggipa ong·aha aro uni ja·mano Jeang Jemin Marak aro Tengkim Marak mangan gnigipa aro gittamgipa ong·e chegipa ong·skaaha.
Apsandake bilsi 15 aro uni ning·o ga·akgipa me·chikrangni katsusaaniko niatgenchimode, Miss. Mechura Marak skanggipa ong·e chegipa ong·skaaha, aro uni ja·mano Sengmatchi Arengh gnigipa chegipa ong·skaengon, Miss. Anasa Chuana Marak gittamgipa ong·e chegiparang ong·skaaha ineba koborna parakataha.
Bilsi 15 aro uni ning·o ga·akgipa chadambe bi·sarangni katsusaanio Mr. Bethnar Sangma skanggipa biapo chegipa ong·aha aro uni ja·mano Mr. Witnar Sangma aro Mr. Batsrang Sangma mangan gnigipa aro gittamgipa gadangni biapo chegiparang ong·angtokskaahachim ineba koborna u·iataha.
Uandake bilsi 15 aro uni gadangogipa me·chik bi·sarangni katsusaanio Miss. Smile Orchid Momin skanggipa biapo chegipa ong·aha, aro uni ja·mano Sevenita Sangma gnigipa ong·skaengon, Sania Marak gittamgipa chegipa ong·skaahachim.
EGH-o Poshan Maah-ko gisik ra·e maniao nutritional run-ko ong·ata
Date:
Share post:
