Bi·sa saldapgipa truck driver aro Exporters Association-ni kosako GSU FIR ka·a

TURA: Re·anggipa Sonibar salpaksachibara, Dalu joloni Mahendraganj-chipakna ro·ong salangenggipa truck gari bolsa, Purakhasia jolo bilsi 5 ong·gipa me·a bi·sa saksako salpdape so·otani ja·man ia truck garini driver aro Dalu General Exporters Association-ni kosako Ampati-oni Garo Students Union (GSU), Purakhasia Police Outpost-o FIR ka·doangaha.
Koborko on·ani gitade, Sonibar salpaksachibara ia truck gari, Dalu joloni Mahendraganj jolchipakna ta·rakbee re·angengmiting somoio Kotchuadok minggipa songo bilsi 5 ong·gipa Laksbath S Sangma-ko saldapeaha aro ja·mano ia garini driver, rim·a man·na kenenba kate dongengachim.
West Garo Hills a·jani SP VS Rathore-ni kobor on·timgiparangna u·iatani gitade, ia me·a bi·sako saldapani ja·man ia truck gari sale katna jotton ka·ahachim indiba ia truck gariko police-rang, Mahendraganj-o rim·sona man·ahachim. Truck gariko rim·na man·ahaoba ia garini driver, ua biaponi kate jokskaahachim.
Indake ong·engon, ia me·a bi·sako saldape siatahani gimin ia truck garini driver aro Dalu General Exporters Association-ni kosako GSU Ampati unit FIR ka·doangaha aro dos dakgipa driver-ni kosako rakbatsranggipa sastiko on·china dabiangaha.
“Ia garini driver-ko ta·raken rim·e rakbatgipa sastiko on·china chinga dabienga. Ia bi·sani sianina exporters association-ba dos donga maina indita chang mikrakatani ja·manoba uamang ramarango simsakani gri garirangko salrongenga. Uni gimin ia exporters association-ni kosakoba nanga gita ja·kurangko de·china chinga dabienga,” ine GSU Ampati unit-ni president Salman D Sangma parakataha.
Ia ramarang gita ro·ong salruraenggipa truck garirangni skatang salengani gimin a·bachengonin dingtang dingtang dolrang ia ram agita ro·ong salruraenggipa garirangni re·ruraaniko champengatchina dabitokengachim ine nikna man·a. Ia ramarang gita ro·ong salruraenggipa garirang salanti re·ruraengani a·sel ramarang nosto ong·atako man·an baksana jolo songdongenggipa manderangnaba kenchakna nangani ong·enga ine dingtang dingtang dolrang, changni chang mikrakatanirangko on·engahachim.