SHILLONG: 2018 bilsini Assembly election-o National People’s Party (NPP) dolni ku·rachakgimin gitan da·o NPP-chi dilenggipa MDA sorkari, a·doko koela badinganiko a·bachengatpilengaha aro koelarangko bikotna gita komibeoba block damgittamnade licence-rangko on·manaha ine Robibar salo NPP-ni state president aro Rajya Sabha-ni MP WR Kharlukhi parakataha.
Kharlukhi-ni parakatani gitade, a·doko niam gita koela bikotaniko a·bachengpiltaina kamko ka·an baksana ia sorkari, Inner Line Permit (ILP)-ko ra·gatna aro Khasi, Garo ku·sikrangko Eighth Schedule-o ra·gatna gitaba apsan dake krenge kamko ka·enga.
“Meghalaya a·doko koela badinganiko a·bachengatpiltaiania chingni election-o manderangna ku·rachakgimin kamrangoni mingsa ong·a aro da·o chinga chingni ku·rachakgimin kamko chu·sokatna man·engahani gimin kusi ong·a maina da·o sorkari, koila block-rangko sualmanaha. Badia sorkarini somoio koela bikotaniko champengatahachim aro badia sorkari ia kamko a·bachengatpiltaina man·aha da·o manderang an·tangtangan nie nike ra·china,” ine Kharlukhi aganaha.
Meghalaya a·doko niam gri koela bikotaniko 2014 bilsio NGT-ni champengatani ja·man re·anggipa antiosan Union Coal Ministry, koela bikotani licence-rangko on·e damgittam koela block-rangko Thomas Nongtdu aro Nehlang Lyngdoh-na on·angahachim. Ra·chakgimin mining plan-ni gitade, ia damgittam block-rango koela bikotaniko 2022 bilsioni a·bachenggnok.
“Chingade ararako ku·rachakgipa gipin dolrang gita ong·ja aro an·tangtangni ku·rachakako chu·sokataha. Koela bikotaniko Congress sorkarini somoiosa champengatahachim aro uamang iako a·bachengpiltaina mamingkoba dakjahachim. Da·alo chinga ia kamko a·bachengpiltaina man·ahani gimin manderang an·tangtangan chingni kamna raiko on·china,” ine Kharlukhi aganaha.
Meghalaya a·doko ILP-ko ra·gatchina aro Khasi, Garo ku·sikrangko Eighth Schedule-o ra·gatchina dabienganiko chu·sokatna gitaba uamang krenge kamko ka·angkugen ineba NPP-ni state president, ku·rachakaniko on·angaha.
