TURA: Adita salrangna skang, West Garo Hills a·jani Purakhasia jolo skulchi re·angenggipa bi·sa saksako ro·ong salgipa truck garini saldape siatahani gimin Association for Democracy & Empowerment (ADE) dol kalimpaaniko parakatenba, ia me·a bi·sako saldape siatanio jak donggipa manderangko ta·raken rim·china aro rakbatgipa sastirangko on·china dabiangaha.
ADE-ni publicity aro Education secretary Federick A Sangma-ni parakatani gitade, batanggimin somoirangoba ia ramarang gita ro·ong salruraenggipa truck garirangni skatang salengani a·sel bang·a manderangan so·otanirangko man·na nangengahachim indiba da·onan ia rama gita ro·ong salruraenggipa truck garirangko maming nirok sandianirang dongjaengani a·sel, manderangni janggirangna kenchakna nanganirang ong·kuengachim.
“Ia ramarang gita ro·ong salruraenggipa truck garirang nangana bate ro·ongrangko gate ta·rakdugae salengani a·sel batanggimin somoirangoba apsan dakgipa a·selrangko chagrongna nangaha ine chinga koborrangko man·soaha. Bangladesh a·songona ro·ong badingatenggipa dolrang, manderangni janggirangna maming simsakani gri salantian ro·ongrangko watatenga aro ia garirang skatang salengani a·sel ramram manderangsa janggirangko gimaatna nangenga. Batanggimin somoirangoba ia ramarango bang·en a·sel ong·anirangko nikna man·engahaoba Forest department, MVI ba Police-rang, ro·ong salruraenggipa truck garirangko simsak nirokanirang dongjaenga,” ine ADE parakataha.
Ia ramarang gita ro·ong salruraenggipa garirangni kosako ta·raken nanga gita ja·kurangko de·china ro·ong badingatenggipa aro dingtang dingtang official-rangko didiatengon, ia garirangni kosako maming ja·kurangko de·jagenchimode mikkangchi an·tangtangan ia ramarang gita ro·ong salenggipa truck garirangko nirokangskagen ine ADE mikrakataniko on·angaha.
