TURA: Re·anggipa Sonibar salo, West Garo Hills a·jani Purakhasia jolo ro·ong salruraenggipa truck gari bolsani, me·a bi·sa saksako saldape siatahani gimin Garo Hills-oni A·chik Association for Protection of Environment (AAPE) aro Williamnagar-ni Niksamso A·chik Society (NAS) dolrangba raken jegalataha.
Re·anggipa Sonibar salo, Dalu joloni Mahendraganj jolchipak ro·ong salangenggipa truck gari bolsa, Purakhasia jolo donggipa Kotchuadok songo, bilsi 5 ong·gipa me·a bi·sako saldape siatahachim.
Indake ong·engon, ia ramarang gita ro·ong aro ma·manti bosturangko salruraenggipa truck garirang, skatang salrongengani a·sel Garo Hills-ni bang·a biaprangon iandakgipa a·sel ong·anirangko nikna man·rongenga ine AAPE aro NAS dolrang, an·tangtangni suk ong·gijaniko parakataha.
Adita salrangna skangba, Ampati-o ro·ong salgipa truck gari bolsa, scooty-o nokchi re·angpilenggipa paningsa sakgniko saldape so·otahachim ine nikna man·a.
Ia ramarango truck garirangni skatang salruraengani a·sel iandake a·sel ong·anirangko nikna man·engoba sorkari, da·onan maming ja·kurangko de·na gisiko nangjaenga ineba ia dolgni NGO-rang, sorkariko matnangataha.
“Ia a·selrangni bidingo judicial inquiry-ko dake sianggipa manderangni nokdangrangna kakket bichalko on·china chinga dabienga. Dos dakgipa manderang jeba ong·china, darangnaba mikkang niteani gri rakgipa sastiko on·na nangchongmota,” ine AAPE aro NAS-ni dilgiparang parakataha.
Garo Hills-ni ramarang gita Bangladesh a·songona ro·ong salruraaniko chu·gimik champengatchina gitaba AAPE aro NAS dolrang, a·dok sorkario dabiangaha.
“Dos dakgipa manderangko rim·e sianggipa bi·sani nokdangna kakket bichalko on·jagenchimode chinga ma·manti bostu salruraenggipa truck garirangko champengatgen,” ineba dolgni NGO-rang mikrakataniko on·angaha.
Sianggipa me·a bi·sani nokdangnaba AAPE aro NAS dolrang, kalimpaaniko parakataha.