TURA: West Garo Hills a·jani Ranggira a·bri jolo donggipa dingtang dingtang songrangona rama jal·langrang dongjani a·sel, songni nokni manderang neng·nikanirangko chagrongna nangtokenga ine Garoland State Movement Committee (GSMC) Babadam unit parakatenba, ia jolrangona rama jal·langrangko ta·raken tarie on·china gita North Tura-ni MLA Thomas A Sangma-na sedoattaiaha.
GSMC Babadam unit-ni chairman Cyril A Sangma-ni parakatani gitade, Ranggira jolo songdongenggipa manderang, Tura jillaona re·rurana gita Ganol chibimako ga·batesa re·na nangtokengon, ia chibimako ga·batna gita jal·langrang dongkujae re·a doanirango neng·nikanirangko chagrongna nangtokengachim.
“Uni gimin ia jolrango songdongenggipa manderangni namgnina Edenbari-oni Chidekgre songo donggipa Tribal Research Institute-ona aro Dakkopgre sorokoni Ganol Sela wari gita Chidekgre-ona rama jal·langrangko tarie on·china chinga mol·molenga,” ine GSMC Babadam unit-ni dilgipa parakataha.
Indake ong·engon, Nokatgre (Nawipilgre) songo da·onan bijoliko man·kujaengani a·sel songni nokni manderang andal min·diksa dongna nangtokenga ineba GSMC Babadam unit-ni chairman parakataha aro ia songna ta·raken bijoliko sale on·china gita North Tura-ni MLA-ko didiataha.