SHILLONG: Assam aro Meghalaya a·dok damgnini sima ario donggipa, sima arini bidingo golmal gnanggipa mitam biaprangona Meghalaya Chief Minister, Conrad Sangma aro Assam Chief Minister, Himanta Biswa Sarma apsan re·ange nigen ine Pa Sangma aganaha.
Biaprangko aro tarikko namedake tik ka·kujaoba a·dok damgnini a·kanggrikenggipa mitam biaprangona sakgnian damsan re·ange nirokena gita miksongenga ine Chief Minister aganaha.
Regional Committee-ni skanggipa tom·aniko ong·ataha aro Meghalaya Sorkari, songgimin chairman-rangko Assam a·dokna mesoke on·aha.
“District Council, Political party, MLA aro civil society-rangni regional level-o gita, dingtang dingtang daito ra·giparangko gronge agangrikchina gita chinga uamangko aganaha” ine Conrad Sangma koborni manderangna aganaha.
Deputy Chief Minister re·anggipa somoio Nongpoh-o mingsa tom·aniko ong·ataha aro golmalrangko namatna re·chakkatengon, Sorkari sakantiniko rimchapgen, regional Committee-rang ru·utgijan tom·gen aro nangenggipa kamrangni bidingo agangrikanggen, Pa Sangma aganaha.
Ri-Bhoi, West Khasi Hills aro East Jaintia Hills district-rango area damprakon dolsa committee-ko songaha.
West Khasi Hills district-ni ning·ogipa Tarabari, Gizang aro Hahim, Ri-Bhoi district-ni Boklapara aro Khanapara-Pillangkata aro East Jaintia Hills-o Ratacherra ia damdok biaprango a·dok damgnini sima arini bidingo meligrikgijanirangko nirokna gita Meghalaya Sorkari dolgittam regional committee-rangko songaha.
Ia songgimin regional committee-rang, Assamni songgimin regional committee-rang baksa bakrime Assam aro Meghalaya a·dok damgnini gisepo a·kanggrikenggipa songrangko nigrike bimingrangko segate on·gen.
Songgimin Committee-rang, biap a·damrangko aroba census-o gita badia biaprango maidakgipa jatrang bang·a uarangkoba nigrikanggen.
