SHILLONG: Gong kror 5,200-na batpile tangka paisarangko jakkalgija on·pilaha ine Comptroller & Auditor General (CAG)-ni report-o parakaniko Meghalaya sorkari jegalataha.
CAG-ni report-o parakaniko jegalatengon, gong kror 5,200-na batpile tangka paisarangko jakkalgija on·pilaha inen agananiara kakket ong·ja ine Sombar salo, a·dokni Chief Minister Conrad K Sangma parakataha.
Chief Minister-ni parakatani gitade, korosrangna sorkari ge·antian nangani krisa hisapsoanirangko daka aro donsogimin hisap gitasa korosko ka·rongachim.
“On·pila ine agananio maiko miksonga ukosa ma·sina nanga. Tangka paisarangko jakkalgija on·pila ine aganiara tangka paisarangko ong·ja aro scheme-rangkoba ong·ja,” ine Sangma talataniko on·angaha.
MDA sorkarina chake aganangengon, batanggimin bilsio Uttar Pradesh a·dok kror 80,000-mangko aro Manipur, Nagaland gita dakgipa salgro salaram a·dokrangba gong kror 3000-4000-mangko on·pilaha ine Chief Minister parakataha.
Re·anggipa bilsimangmangon Assam a·dokba gong kror 30,000-mangko on·pilaha ine janapatengon, “Chinga scheme-rangko on·pila ong·ja aro ian Meghalaya a·dokosan ong·enga ong·ja,” ine Sangma parakataha.
State public sector enterprise-rangni bidingo CAG-ni on·gipa report-ni bidingo janapatskaengon, SPSE-rango dingtang dingtang ra·bianirang donga aro ia ra·bianirangko namatna gita sorkari jotton ka·enga ine Chief Minister parakataha.
Mawmluh-Cherra Cements Ltd (MCCL) aro Khadi Board gita dakgipa SPSE-rangko sorkari tangatpilna jotton ka·enga ineba Sangma toe aganangaha.
Indita tangkarangko jakkalgija on·atpilahani gimin a·dokni Chief Secretary-ko talatchina ge·etaha ine Sombar salo, Public Accounts Committee-ni Chairman Charles Pyngrope parakatahachim.
