SHILLONG: Hynniewtrep National Liberation Council (HNLC) bobil dolni gitcham general secretary Cheristerfield Thangkhiew-ko so·otanio jak donggipa police officer-rangko kam dontongatchina dabianiko chu·sokatna man·jaenga ong·ode a·dok sorkari, inquiry-ko CBI-na pakwate on·skana nanga ine dabienba, kamoni neng·takgimin police sakgittam, sianggipa Cheristerfield-ni jonggipa Granary Starfield Thangkhiew-na chittiko sedoataha.
“So·otako man·gipa Cheristerfield Thangkhiew-ni depante sakgnini dabienga gita inquiry-ko CBI-na pakwate on·na nanga. Kam chonbatgipa officer-rangde, an·tangtangna dal·batgipa police officer-rangni bidingo am·sandina man·jawa,” ine kamoni neng·takgimin police sakgittam, ‘Ka Sur Ki Pulit Ba Lah Shongthait’-ni bimingo, Cheristerfield-ni jonggipa Granary Starfield Thangkhiew-na seatgipa chittio janapataha.
Ia chittini bidingo sing·sandiaton, ua chittiko post gita man·soaha ine Robibar salo, Granary parakataha.
Kamoni neng·katgimin police sakgittamni chittio parakatani gitade, uamangba HNLC bobil dol baksa gogrikanirango bang·en dongpaahachim indiba uamangde silchidare ra·bitgijagipa bobil dolni manderangkode iandake so·ote gala dongjachim.
“Chingni kobor man·soani gitade, a·dokni DGP R Chandranathan aro IGP (Law & Order) Mukesh Kumar Singh-ni ge·etaniko man·esa IPS officer sakgni, chong·motan Jagpal Singh Dhanoa aro Shailendra Bamaniya, maming sakki gri Thangkhiew-ko so·otna re·angaha,” ineba ia police-rang, chittio parakataha.
Minister-rang aro MLA-rangba, ia IPS officer-rangni kosako ku·rangko on·na gita kentoka aro iako ma·sie uamang namen suk ong·ja ineba kamoni neng·takgimin police sakgittam, chittio parakataha.
Assam-o kamko ka·engmiting somoioba da·o Meghalaya a·doko DGP ong·enggipa officer-ni kosako bang·en case-rang dongachim ineba gitcham sipairang parakataha.
IGP Mukesh Kumar Singh-ni gimin janapatskaengon, ia police officer-an Jowai-o Fullmoon Dhar-ko aro Tura-o Balsan Marak-ko so·otanioba jak donggipa officer ong·achim ine ia sakgittam police-rang parakataha.
Indake ong·engon, ia chittiko Cheristerfield-ni jonggipana seatani ja·mano jinmani mikkangona re·bae kakketko parakchina gita Sombar salo, Khasi Students Union (KSU)-ni dilgiparang, an·tangtangko kamoni neng·takgimin police-rang ine chitti seatgipa manderangko didiatskaaha.
“Chittimangmangko seataigija uamang pilakni namgnina jinmani mikkangona re·bae kakketko parakeode nambatgen maina jeba chittikode seatna man·aia indiba uamang kakketko aganbebeenga ong·ode jinmani mikkangona re·bae kakketko parakeode nambatgen,” ine Sombar salo, KSU-ni president Lambokstar Marngar parakataha.