SHILLONG: Meghalaya a·dokni damgittam Assembly constituency-rango by-election-ko da·o re·baenggipa October-ni 30 tariko ong·atna siengon, ia damgittam constituency-ni manderang, Congress dolnan pu·onaigen ine Mongolbar salo Congress Legislature Party (CLP)-ni dilgipa Mukul Sangma parakataha.
“Candidate sakantini biterangkon manderangsa rai on·gen. A·dokni pilak biaprangon sorkarini maming kamrangko nikna man·jaengani gimin manderang sako seokgen anga ma·sisoenga,” ine Sangma, Congress dolni seat-rangko man·pilna ka·donga gnang aganaha.
By-election damgittamo susana sienggipa Congress candidate-rangko basako parakgen ine sing·on, party tikitrangko on·ani bidingo tik ka·na gita a·bachengonin Congress dolo niamrang donga ine Sangma parakataha.
Candidate-rangna party tikitrangko on·na gita State Election Committee (SEC) aro All India Congress Committee (AICC)-san chanchianggen ineba CLP-ni dilgipa parakataha.
“Ia pilak niamrangko ja·rikesa ia damgittam by-election-na candidate-rangko seokgen,” ine ua aganaha.
Meghalaya a·dokni sakgittam MLA-rang, chong·motan Mawryngkneng constituency-ni MLA David A Nongrum, Mawphlang constituency-ni MLA SK Sunn aro Rajabala constituency-ni MLA Dr Azad Zaman, ia bilsini gisepo siangahani gimin ia damgittam constituency-ni by-election-ko ong·atna nangengachim.
Nongrum aro Zaman-de sakgnian Congress MLA-rang ong·achim indiba Sunn-de Independent MLA ong·skaachim.
