SHILLONG: Mongolbar saloni Budbar salona konta 24-ni gisepo Meghalaya a·dok gimiko sak 169 manderang COVID-19 man·daptaiaha aro apsan salon mande sak 3 a·doko COVID man·e siangskaaha.
Konta 24-ni gisepo COVID-19 man·dapgipa sak 169 manderangko channe da·o Meghalaya a·dok gimiko COVID-19 man·e dongenggiparang gimik sak 1693 gapaha aro ia apsan salon mande sakgittam COVID-19 man·e siangdaptaiahani gimin a·dok gimiko COVID man·e sianggiparangara gimik sak 1400 gapskaengaha.
Konta 24-ni gisepo COVID man·gipa sak 169 manderangoni, sak 1-de East Garo Hills-o, sak 3-de East Jaintia Hills-o, sak 95-de East Khasi Hills-o, sak 20-de Ri Bhoi a·jao, sak 2-de South West Khasi Hills-o, sak 2-de West Garo Hills-o, sak 40-de West Khasi Hills-o aro sak 6-de West Jaintia Hills a·jao ong·a.
Salsani gisepo COVID man·e sianggipa mande sak 3-oni sak 2-de East Khasi Hills-o aro saksade South West Khasi Hills a·jao ong·a.
Ia apsan salon gimik sak 166 manderangde Meghalaya a·dokni dingtang dingtang biaprango COVID-19-oni nampilskana man·aha aro uandaken ia COVID-oni nampilgiparangba gimik sak 78,068 gapskaengaha.
