SHILLONG: Sombar saloni Mongolbar salona konta 24-ni gisepo Meghalaya a·dok gimiko sak 95 manderang COVID-19 man·daptaiaha aro apsan salon mande sakgni a·doko COVID man·e siangskaaha.
Konta 24-ni gisepo COVID-19 man·dapgipa sak 95 manderangko channe da·o Meghalaya a·dok gimiko COVID-19 man·e dongenggiparang gimik sak 1693 gapaha aro ia apsan salon mande sakgni COVID-19 man·e siangdaptaiahani gimin a·dok gimiko COVID man·e sianggiparangara gimik sak 1397 gapskaengaha.
Konta 24-ni gisepo COVID man·gipa sak 95 manderangoni, sak 1-de East Garo Hills-o, sak 4-de East Jaintia Hills-o, sak 35-de East Khasi Hills-o, sak 1-de North Garo Hills-o, sak 12-de Ri Bhoi a·jao, sak 1-de South West Garo Hills-o, sak 4-de South West Khasi Hills-o, sak 7-de West Garo Hills-o, sak 16-de West Khasi Hills-o aro sak 14-de West Jaintia Hills a·jao ong·a.
Salsani gisepo COVID man·e sianggipa mande sakgnioni sak 1-de East Khasi Hills-o sakgipinde Ri Bhoi a·jao ong·a.
Ia apsan salon gimik sak 152 manderangde Meghalaya a·dokni dingtang dingtang biaprango COVID-19-oni nampilskana man·aha aro uandaken ia COVID-oni nampilgiparangba gimik sak 77,902 gapskaengaha.