TURA: Bading chiwale cha·ani aro bading chiwalani kamrangko a·bachengatani bidingo agan-skie on·na gita re·anggipa September-ni 28 aro 29 tarikrango salgnina, Tura-ni Community Science College-o poraienggipa aro gitcham chatro chatrirangna, National Agricultural Higher Education Project-Institutional Development Plan (NAHEP-IDP)-ni ning·o online workshop-ko ong·atangaha.
Ia workshop-ko ong·atanio Community Science College-o poraienggipa aro gitcham chatro chatrirangoni gimik sak 52 manderang bakko ra·angaha aro uamangna Prime Minister’s Employment Generation Program (PMEGP) aro Pradhan Mantri Formalisation of Micro Food Processing Entreprises (PMFME)-ni ning·o on·enggipa dingtang dingtang janggi tangani cholrangni gimin agan-talate on·angaha.
Ia online workshop-ko ong·atanio bakko ra·e, chatro chatrirangna agan-talate on·anggipa manderangara, Pune-o donggipa Symbiosis Centre for Entrepreneurship & Incubation (SCEI)-ni CEO Yogesh D Brahmankar, Shillong Martin Luther Christian University (MLCU)-ni ning·o donggipa Computer Sciences Department-ni Assistant Professor Sangyal Tamang, Tura District Commerce & Industries Centre (DCIC)-ni Functional Manager Cherak Flint R Marak aro PMFME-ni State Lead Project Manager Joshua Phanwar ong·a.
Ia online workshop-ko ong·atanio Community Science College-ni gitcham chatri aro Cakelicious Tura-ni nokgipa Rempuii A Sangma-ba an·tangni bading chiwalani kamrangko a·bachengatani gimin an·tangni ripengskarangna agan-talate on·angaha.