SHILLONG: Meghalaya a·dokni damgittam Assembly by-election-na kamrangko ka·sotokengon, COVID-19-ni batrikrikaniko champengna gita dongimin niamrangko raken ja·rikchina a·dokni Chief Minister Conrad K Sangma, dingtang dingtang political dolrangko didiataha.
Meghalaya a·dokni Chief Minister Conrad Sangma an·tangba National People’s Party (NPP)-ni national president ong·engachim aro ia damgittam Assembly by-election-na Mongolbar salon NPP-ni sakgni candidate-rangkode parakatmanahachim.
“Ia by-election-rangko ong·atanio ja·rikna gita an·chingna Election Commission, niamrangko on·gen aro an·ching pilak dolrang aro candidate-rangba ia niamrangko raken ja·rikna nanggen,” ine Sangma aganaha.
A·songo COVID-19 giproroani bon·srangkujaengoba ia by-election-ko ong·atani gimin sing·on, ia pilakkon name nichengesa ECI, tarikrangko tik ka·ahakon ine Chief Minister aganaha.
Mongolbar salo Cabinet-ni tom·e chanchirimani bidingo talataniko on·angengon, Cabinet-ni tom·anio East Khasi Hills a·jao nangchakegipa kamrangni giminsan chanchiaiaha aro By-election-ko ong·atani bidingo ECI parakata joljolan Model Code of Conduct-koba ra·gatangaha ine Chief Minister parakataha.
“Uni gimin an·ching kamrangko ka·engon, dongimin niamrangko ja·rike ka·na,” ine ua aganaha.
Meghalaya a·dokni damgittam Assembly constituency-rang, chong·motan Mawryngkneng, Mawphlang aro Rajabala Assembly-ni by-election-ko re·baenggipa October jani 30 tariko ong·atgen ine Mongolbar salo Election Commission of India (ECI) parakatahachim.
Meghalaya a·dokni sakgittam MLA-rang, chong·motan Mawryngkneng constituency-ni MLA David A Nongrum, Mawphlang constituency-ni MLA SK Sunn aro Rajabala constituency-ni MLA Dr Azad Zaman, ia bilsini gisepo siangahani gimin ia damgittam constituency-ni by-election-ko ong·atna nangengachim.
