SHILLONG: Budbar saloni Bristibar salona konta 24-ni gisepo Meghalaya a·dok gimiko sak 4 manderang COVID-19 man·e siangtaiaha aro apsan salon sak 129 manderang a·doko COVID man·dapskaaha.
Konta 24-ni gisepo COVID-19 man·dapgipa sak 129 manderangko channe da·o Meghalaya a·dok gimiko COVID-19 man·e dongenggiparang gimik sak 1619 gapaha aro ia apsan salon mande sak 4 COVID-19 man·e siangdaptaiahani gimin a·dok gimiko COVID man·e sianggiparangara gimik sak 1404 gapskaengaha.
Konta 24-ni gisepo COVID man·gipa sak 129 manderangoni, sak 3-de East Jaintia Hills-o, sak 66-de East Khasi Hills-o, sak 1-de North Garo Hills-o, sak 4-de Ri Bhoi a·jao, sak 2-de South West Khasi Hills-o, sak 42-de West Khasi Hills-o aro sak 11-de West Jaintia Hills a·jao ong·a.
Salsani gisepo COVID man·e sianggipa sak 4 manderangoni sak 2-de East Khasi Hills-o, sak 1-de East Garo Hills a·jao aro sak 1-de West Jaintia Hills a·jao ong·a.
Ia apsan salon gimik sak 199 manderangde Meghalaya a·dokni dingtang dingtang biaprango COVID-19-oni nampilskana man·aha aro uandaken ia COVID-oni nampilgiparangba gimik sak 78,267 gapskaengaha.
