TURA: Re·baenggipa October jani 30 tariko ong·atna sienggipa Rajabala Assembly by-election-na gitcham MLA Abdus Saleh-ko National People’s Party (NPP)-ni candidate-na Mongolbar salo parakatani ja·man Dr Mizanur Rahman Kazi-na chakenggipa manderang, NPP-ni kamna suk ong·gijaniko paraktokskaaha.
Re·anggipa Sonibar salosan, Dr Mizanur Rahman Kazi-na chakenggipa manderang, NPP-ni tikitko una on·china dabie, Rajabala-o jinma tom·aniko ong·atangahachim indiba Rajabala by-election-na NPP-ni tikitko gitcham MLA Abdus Saleh-na on·aha ine Mongolbar salo NPP-ni dilgiparang parakatani ja·man, Dr Kazi-na chakenggipa manderang suk ong·gijaniko parakattokskaaha.
Ia by-election-o NPP-ni tikitko man·e susana sienggipa Abdus Saleh-ara Congress doloni NPP-o napanggipa ong·achim aro Dr Mizanur Rahman Kazi-ara, 2018 bilsini Assembly election-o Rajabala constituency-oni NPP-ni tikitchi susagipa ong·skaachim. 2018 bilsini Assembly election-o uamang sakgnian amako man·rikahachim maina ua somoio Congress dolni candidate Dr Azad Zaman chegipa ong·ahachim. Dr Azad Zaman, ia bilsini a·bachengachibara rang·gitik saaniko man·e siangahani a·selan da·o Rajabala by-election-ko ong·atna nangengachim.
Indake ong·engon, Rajabala by-election-na NPP-ni tikitko Abdus Saleh-na on·engani gimin Dr Kazi-na chakenggipa manderang, NPP-ni kamo suk ong·jaenba, ia by-election-o Saleh-ni kosako susaskachina Dr Kazi-ko didienga ine kobor on·aha.
