TURA: Sukrobar salo Meghalaya a·dokni Chief Minister Conrad K Sangma, North Garo Hills a·jani A·dokgre jolo donggipa Reking songo St Andrew’s Secondary School-ni gital nokko nokdonggae on·angaha aro ia skul nokko nokdonggae on·angani somoio Meghalaya Assembly-ni Deputy Speaker Timothy D Shira, Kharkutta-ni MLA Rupert Momin, Bajengdoba-ni MLA Pongseng Marak, North Garo Hills a·jani Deputy Commissioner RP Marak, skulni skigiparang aro gipin dilgiparangba dongpae bak ra·angaha.
Ia skul nokko nokdonggae on·angani somoio a·dokni Chief Minister jinmana aganprakangengon, a·doko lekka porako tang·doatanian ia sorkarini mongsonggipa daito ong·engani gimin a·dokni pilak elementary, secondary aro college-rango skie ra·ani bewalko nambatatna gita bang·bea tangka paisarangko chamaha ine parakangaha.
Williamnagar aro Baghmara college-rangna a·dok sorkari, gong kror 12 ka·e tangka paisarangko chame on·manaha aro ia college-rangko mikkang bilsio matchotgen ineba Chief Minister parakataha.
East Garo Hills a·jani Rongjeng-o rikenggipa model college-ko da·o matchotaha aro ia college-ko mikkang bilsio, a·dokni bilsi 50 gapaniko manianio kulignok ineba ia tom·anio Sangma parakangaha.
Meghalaya a·doko secondary aro higher secondary gadango pass ka·anirang komienga ine an·tangni suk ong·gijaniko parakangengon, a·doko lekka porani gadangko nambatatna gita sorkari, dingtang dingtang dolrang baksa nangrime kamko ka·enga ine Chief Minister parakataha.
Re·baenggipa 2021 bilsio Meghalaya a·dokni bilsi 50 gapaniko maniani somoio a·dok sorkari, ming 50 gital project-rangko a·bachengatgen aro ia manianiona India a·songni Prime Minister Narendra Modi-koba okamataha ineba Chief Minister parakataha.
