TURA: Garo Hills-o mande rim·gittangna, tangka dabie ra·na aro uandake ma·manti so·sojengjeng ong·atani kamrangko ka·na miksonge A·chik National Socialist Council (ANSC) ine gital bobil dol bikotna jotton ka·gipa sak 11 manderangko police-rang rim·na man·aha.
Koborko on·ani gitade, re·anggipa antirangonin Meghalaya a·dokni dingtang dingtang biaprango gital bobil dolrangko bikotna jotton ka·enga ine koborrangko man·soengani gimin police-rang mikrakbee kamrangko ka·tokengachim aro uandaken West Garo Hills a·jani police-rang, South, East aro North Garo Hills police-rangni dakchakanichi Garo Hills-o gital bikotenggipa ANSC minggipa bobil dolni manderangko rim·na man·aha.
Ia bobil dolni bidingo koborko man·soani ja·man police-rang skanggipa, ia ANSC dolni chairman Chekam Ch Sangma-ko re·anggipa September-ni 25 tariko Tura Hawakhana-oniko rim·na man·aha aro uoniko ia bobil dolni ma·manti lekkarang aro diary-rangko man·aha ine West Garo Hills a·jani Superintendent of Police (SP) Vivekanand Singh parakataha.
“Ia mandeko rim·na man·ani ja·man chinga sing·sandion, ua gipin sak 25 ba sak 30 manderang baksa ia dolko bikotaha aro da·o uamang an·tangtangni constitution-ko sena aro ma·manti ong·gija kamrangko ka·na gita silchidarerangko chimongna a·bachengengahachim ine ua ku·rachakaha. Iani bidingo chinga mokordomako ka·enba, ning·tue sandianirangko dakengkua,” ine Singh parakataha.
SP-ni u·iatani gitade, ia ANSC dolni chairman-ko rim·na man·ani ja·man police-rang ia dolni gipin sak 10 manderangkoba rim·na man·aha aro uamangni bimingrangara, dolni vice chairman Wallison B Marak ba Sengkim, Chijang A Sangma ba Tejang, Krinsbar B Marak ba Sopel ba Silang, Arbas B Marak ba Roson ba Jonbath, Raking A Sangma ba Kasrang, Juliash N Sangma ba Jelius, Chekam R Marak ba Chekand, Hereson K Sangma ba Mikdep, Daniel B Marak ba Deny aro Nathalie R Sangma ong·a.
Indake ong·engon, rim·ako man·gipa manderang baksana gipin sak 15 ba 20-mangni gita ia dolo bak ong·gipa dongkuenga ine police-rang chanchichipenga aro ia manderangko rim·na gitaba police-rang rake kamko ka·enga ine SP parakataha.
Rim·a man·gipa manderangoniko police-rang, SBML silchidare pong 2 aro 9 mm pistol pongsako man·aha ineba SP parakataha.
SP-ni u·iatani ia apsan dolni manderangan, tangka gile ra·na gita AKMA minggipa NGO-ko bikotnaba miksonganirang dongachim.
