SHILLONG: Vincent Pala aro Dr Mukul Sangma- uamangni gisepo maming dal·a golmal dongja, ge·gittam seat- Mawryngkneng, Mawphlang aro Rajabala-o ong·atnasienggipa bye-election-o ku·cholsan ong·e kam ka·enga ine Meghalaya-ni AICC in-charge Manish Chatrah aganaha.
Sonibar salo The Shillong Times-ni kobor ra·timgiparang baksa agangrikmitingo Chatrah, indine aganaha, “Pala aro Mukul- uamangni gisepo dal·a golmal dongja, sakgnian mingsinggipa aro namgipa dilgiparang ong·a, aro uamang PEC meeting-oba gronggrikaha.”
Nokdangode kajia-golmal ong·anirang dongaia, indiba party iandakgipa chonchongipa kattarangko chanchie dongja, bye election-o chena miksonge kam ka·enga.
Uandake sakgni dilgiparangni gisepo meligrikgijaniko namatna AICC, okamatahama ine sing·on, “haida AICC, uamangko election-ni bidingosa agangrikna okamatengnaba gnang” ine Chatrah agandapaha.
