TURA: Chang 152-gipa Garo Hills Day-ko maniani bak gita BJP Tura City District Committee (TCDC) baksana BJYM nangrimenba, 9-Tura MDC cup-ni bimingo dingtang dingtang kal·susaanirangko Sonibar salo ong·atangaha.
COVID-19-ni a·sel chadamberang bilsi gimik noktangtango napchipe dongtokna nangahani gimin Tura-ni MDC Bernard N Marak-ni dakchake on·anichi BJP-TCDC aro BJYM nangrimenba, dingtang dingtang kal·susaanirangko Tura Don Bosco School kal·chakramo ong·atangaha. Ia program-ni bak gita dingtang dingtang gittimrango jinma rongtal an·talatanirangkoba gittimni me·chikrang dakdilangaha.
Chang 152-gipa Garo Hills Day-ko maniani bak gita Tura Badminton Association baksa Tura MDC Cup Badminton kal·susaani, Tura Basketball Association baksa nangrime me·chik aro me·asarangna Basketball kal·susaani, BJYM baksa nangrime Volleyball kal·susaani aro Durama Motorsports & Adventure Club baksa nangrime ‘Challang Natimang Motocross’ susaanikoba dingtang dingtang biaprango ong·atangaha.
Iana agreba, Tura MDC Cup-ni ning·o Karaoke git ring·susaani, Chine Rongsni (Seven Stones) aro Dangguti kal·susaanirangkoba ong·atangaha.
Ia dingtang dingtang program-rangko chu·sokgipa ong·atna man·ahani gimin BJP-TCDC, West Garo Hills District Administration, Tura Don Bosco School aro dingtang dingtang dolrangko mittelpilangaha.
Mikkangchi online gita git ring·susaani, noksa salsusaani, essay sesusaani, chroksusaani aro uandakgipa program-rangko ong·atangkugen ineba BJP-TCDC u·iataha.
Chang 152-gipa GH Day-ko maniani bak gita kal·susaanirangko ong·ata
Date:
Share post:
