TURA: Re·anggipa October-ni 1 aro 2 tarikrango A·chik Literature Society (ALS) aro NEHU Tura campus-ni ning·o donggipa Garo department nangrime, salgnina online International Webinar-ko ong·atangaha aro ia webinar-ko ong·atani Meghalaya aro Assam a·dok baksana Bangladesh a·songoniba skigiparang aro u·i-ma·sigipa manderang bakko ra·angaha.
Ia webinar-ko ong·atanio bakko ra·giparang gimik ming 15 paper-rangko poraiataha aro ia webinar-o Bangladesh a·songoni Badhon Arengh, Bangladesh-o A·chik manderangni ku·aganani aro seaniko nambatatna gita segimin paper-ko poraiataha.
Meghalaya aro Assam-ni A·chikrang dingtang dingtang katta bichongrangko ra·e seskaaha aro uamangoni Kroshnil D Sangma, A·chikrangni me·chikchiko chanani aro nok man·rikani bidingo seaha, Lorinda D Marak, Rabindranath Tagore-ni Gitanjali-o Isolko mandeo u·iani gimin seaha, Seming D Sangma, Kamrup jolo A·chikrangni daka rikani aro ku·aganani gimin seaha, Rosa Mary Ch Sangma, A·chik, Khasi aro Assamese, Kokborok aro Sikkimese-o pagitcham ma·gitchamrangni golporangko tosusaani gimin seaha, ALS-ni president Caroline R Marak, A·chik oral literature-ni gimin seaha, ALS-ni secretary Crystal Cornelious D Marak, Nokdang dakmesokani plot, character aro theme-ni gimin seaha, Colnat B Marak, Rongtalgipa sastroo folklore gita poraie myth-rangko niani gimin seaha, Sengsime A Sangma, A·chikrangni jumango bebera·ani gimin seaha, Yanketina Goldiva D Sangma, Anthropocene aro Garo Hills-ni gimin seaha, Thonobirth G Momin, Chibok aro A·we ku·sikni kattarango apsana ba dingtangniko mesokani gimin seaha, Jacqueline R Marak, Sastroni character-rang jemangan tragic hero gita ga·akona, uarangni gimin seaha, Basan R Marak, do·orangni bewalko nie A·chikrangni bebera·ani gimin seaha, Barbara S Sangma, Henry James-ni The Art of Fiction-ko pe·e aganani gimin seaha aro Fameline K Marak, Wankadoa aro Wanbasala manianirangni gimin seskaaha.