NEW DELHI/SHILLONG: Meghalaya-o Congress party-ni gisepo so·sojengjeng ong·anirangko namatna gita miksongeba, Congress general secretary Rahul Gandhi mija Robibar attamo Meghalaya Pradesh Congress Committee president Vincent H Pala aro Congress Legislature Party dilgipa, Mukul Sangma mangko New Delhi grongaha.
Rahul Gandhi, uni official dongchakramo Meghalaya Congress-ni sakgni dilgiparangko grongaha. Mukul aro Pala mang sakgnian Gandhi baksa meligiparang ong·a. Uamangko grongani somoio, AICC dilgipa, KC Venugopal aro party-ni Meghalaya in-charge, Manish Chatrath mangba dongpaaha.
Uamangni gronge agangrikani bidingo maming koborrangko janapjaomangba, Meghalayani sakgni dilgiparang, re·baenggipa October 30 tariko ge·gittam assembly seat-rangna by-poll-o susaatnasienggipa sakgittam party candidate-rangni bidingo janpbaaha. Meligrikgijanirangko namaona ra·bana gita miksonge, Congress high command, sakgni dilgiparangko Delhi-ona okamataha.
Mukul, an·tang baksa mamingkoba agangrikchenggija Pala-ko MPCC president songani gimin suk ong·gijaniko parakahachim aro party-ni gipsepo meligrikgijanirang ong·ahachim ine nikatna man·a, Mukul-ko, Trinamool Congress-o adita MLA-rang baksa napna am·engaha ineba koborrango separakpilahachim.
Unomitingo A·dok Congresso maming neng·nikani dongja, aro pilak kamrangko namatna man·aha ine Meghalaya in-charge, Manish Chatrath aganaha.
