SHILLONG: Sombar saloni Mongolbar salona konta 24-ni gisepo Meghalaya a·dok gimiko sak 96 manderangsan COVID-19 man·daptaiaha aro uandaken da·o Meghalaya a·dokoba COVID man·giparang ka·sine komiroroangengaha ine nikna man·enga. Ia apsan salon mande saksa a·doko COVID man·e siangskaaha.
Konta 24-ni gisepo COVID-19 man·dapgipa sak 96 manderangko channe da·o Meghalaya a·dok gimiko COVID-19 man·e dongenggiparang gimik sak 1373-ona tang·onangaha aro ia apsan salon mande saksa COVID-19 man·e siangdaptaiahani gimin a·dok gimiko COVID man·e sianggiparangara gimik sak 1409 gapskaengaha.
Konta 24-ni gisepo COVID man·gipa sak 96 manderangoni, sak 3-de East Garo Hills-o, sak 64-de East Khasi Hills-o, sak 4-de Ri Bhoi a·jao, sak 2-de South West Garo Hills-o, sak 1-de South West Khasi Hills-o, sak 2-de West Garo Hills-o, sak 13-de West Khasi Hills-o aro sak 7-de West Jaintia Hills a·jao ong·a.
Salsani gisepo COVID man·e sianggipa mande saksade West Khasi Hills a·jao ong·skaa.
Ia apsan salon gimik sak 216 manderangde Meghalaya a·dokni dingtang dingtang biaprango COVID-19-oni nampilskana man·aha aro uandaken ia COVID-oni nampilgiparang gimik sak 79,173 gapskaengaha.