TURA: Dadenggre Civil Sub-Division-o Jio network-ko name man·jaengani a·sel jolni manderang aro mongsongbate chatro chatrirang neng·nikanirangko man·tokna nangenga ine FKJGP Dadenggre circle parakataha.
FKJGP Dadenggre circle-ni parakatani gitade, Dadenggre jolrango bang·bata manderangan Jio network-ko jakkalgiparang ong·a indiba ia sal somoirango Jio network-ko name man·jaengani a·sel office-ni kamrangko ka·anio aro mongsongbate chatro chatrirang, an·tangtangni online class aro porikkarangko seanio neng·nikanirangko chagrongna nangtokenga.
“A·bachengode Jio network Garo Hills-o namen kam ka·achim indiba ia sal somoirangode ia Jio network namsrangjaengaha aro iani a·sel Dadenggre jolrango Jio network-ko jakkalenggipa manderang neng·nikanirangko man·tokna nangengaha,” ine FKJGP Dadenggre circle parakataha.
Indake ong·engon, jolo songdongenggipa manderangni namgnina aro mongsongbate chatro chatrirangni namgnina Jio network-ko nambate on·china gita FKJGP Dadenggre circle, Jio company-ni official-rangko didiataha.
