SHILLONG: Shillong songjinmako rongtale rakkina aroba Indiani rongtalgipa songjinma-rangni gisepo ba list-o Shillong songjinmako skanggipa ong·na kam ka·china gita PHE Minister Renikton Lyngdoh Tongkhar, officer-rangko aro gittimni manderangko didiaha. Swachh Survek-chan Grameen-ni bidingo da·al mingsa state level workshop ba tom’aniko ong·atgipao aganprak-engon, re·anggipa 2020 bilsio Swachh Survekchan-ni gita survey ba nirikkie sandie parakatanio, Madhya Pradesh-ni Indore, Indiani rongtalgipa songjinmarangni gisepo brigipa changna kingking skanggipa gadangko man·aha ine Minister aganaha. Meghalaya a·dok, Swachh Bharat Abhiyan-na re·mikkangenga ine aganengon, rongtalgipa aro an·seng baljokgipa environment-ko rakkina nangnikaniko Minister aganaha.