BAGHMARA: India a·songni jakgitelko man·aoni bilsi 75 gapaniko manienggipa ‘Azadi Ka Amrit Mahotsav’-ni bak gita re·anggipa October-ni 2 tarikonin South Garo Hills a·jani dingtang dingtang biaprango, District Legal Services Authority (DLSA)-ni gita PAN India Awareness aro outreach program-rangko ong·atenga aro uandaken ia program-ko Emangre songoba ong·atangaha.
Emangre songo ia program-ko ong·atanio South Garo Hills a·jani Chief Judicial Magistrate Daniel S Marbaniang, a·song gimikon manienggipa ‘Azadi Ka Amrit Mahotsav’-ni bidingo talataniko on·angenba, a·songni jakgitelaoni ia bilsi 75-ni gisepo mai kamrangko a·songo chu·sokatna man·aha aro mairangko man·kujaengachim, uarangni bidingo songni nokni manderangna agan-talate on·angaha. A·songko rikanio aro namroro silroroatanio chadamberangan mongsonggiparang ong·enga ineba ua aganaha.
Emangre songo Tourism Hub-ko kuliahani gimin songni manderangko mittelpilangengon, ian songo noko namroro silrorobaenganiko mesokani ong·enga ine Marbaniang parakataha.
South Garo Hills a·jani Masighat-oba ia apsan program-kon ong·atangaha aro ia program-ko ong·atanio Baghmara-ni District & Sessions Judge Gasalynn Rani, jinmana aganprakangengon, DLSA aro Legal Aid Counsel (LAC)-rangni kamrangni bidingo songni nokni manderangna agan-talate on·angskaaha. A·songo songdongenggipa mande sakantian DLSA-ni indin dakchake on·aniko man·na bil donga ine talatangengon, songsalo drae til·ekani ba kragija dake jakkalanirangko man·enga ong·ode iandakgipa indin dakchake on·anirangko ra·china gita Rani, songni nokni manderangko ku·pattiangaha.
Ia program-ko ong·atanio dongpae jinmana agan-talate on·anggipa gipin manderangara, Baghmara Police Station-ni officer-in-charge Simseng A Sangma, South Garo Hills a·jani Para Legal Volunteer Milan M Sangma aro gipinrang ong·a.