TURA: ‘India at 75’ program-ni bak gita Bristibar salo, Meghalaya State AIDS Control Society aro Tura Don Bosco College-ni Red Ribbon Club nangrimenba, Zonal Level Quiz Competition-ko ong·atangaha.
Ia program-ko ong·atanio West Garo Hills a·jani District Maternity & Child Health Officer Dr Ivonne M Sangma, mongsonggipa sokgipa ong·e jinmana aganprakangengon, an·chirangko on·gilna nangani bidingo u·i-ma·sianirang komikuengani gimin an·tangni suk ong·gijaniko parakangaha. An·chirangko nangenggipa manderangna dakchakna gita an·chirangko on·gilani bidingo manderangna u·iatchina gitaba ua, ia program-o bak ra·gipa mande sakantikon didiangaha.
HIV/AIDS sabisini gimin aganangengon, ian songsalo man·enggipa neng·nikani ong·enga aro ia sabisini gimin manderangna mikrakatanirangko on·anichisan ia sabisini a·sel manderangni sianiko komiatna man·gen ine Dr Sangma aganaha.
Ia program-ko ong·atanio Respiratory Diseases Specialist Dr Bandi K Sangma-ba dongpae jinmana aganprakengon, Tuberculosis saaniara altue man·na amgipa sabisi ong·a aro ia sabisiko warachakna gisik nangjagenchimode ian sajinma pil·na gita amaigen ine mikrakataniko on·angaha. Ia TB sabisiara HIV/AIDS sabisi baksa nangchapgipa ong·a ineba Dr Sangma aganaha.
Ia Zonal Level Quiz Competition-o Tura Don Bosco College skanggipa biapko man·e chegipa ong·aha aro Mendipathar College, gnigipa biapko man·skaaha. Ia college damgnini chatro chatrirang da·o State Level Quiz Competition-o bak ra·angskagen.
Ia program-ko ong·atanio dongpae bakko ra·anggipa gipin manderangara, Shillong MACS-ni Assistant Director Alok Lanong, Tura Don Bosco College-ni Principal Fr Bivan R Mukhim, English Department-ni HoD Barbara S Sangma aro gipinrang ong·a.