TURA: 47-Rajabala (G) Legislative Assembly Constituency-ni by-election-na Model Code of Conduct (MCC)-ko ra·gatahani gimin election-ni somoio saoba ku·mitdu du·genchimoba ba ra·genchimode Indian Penal Code-ni Section 171 B-o pangchake bilsisana pattoko donako man·gen ba daiko gamna nanggen ba ia minggni sastirangko man·gen ine West Garo Hills a·jani District Election Officer u·iataha.
Election-ni somoio candidate-ko ba seokgipa manderangoniko ba jekoba ka·mikkenatgenchimode Indian Penal Code-ni Section 171 C-o pangchake bilsisana pattoko donako ba dai gamna ba minggni sastirangkon man·gen ineba District Election Officer u·iataha.
Ku·mitdu du·aniko ra·jachina gita manderangko didiatengon, saoba ku·mitdu du·genchimode ba iandake ku·mitdu du·ani ba ra·ani bidingo kobor man·genchimode aro sakoba ka·mikkenatanirangko kobor man·genchimode salo konta 24 kam ka·enggipa Complaint Monitoring Cell-ni toll free nombor 222000-ona ka·e u·iatchina gita DEO u·iataha.
By-election-ni somoio gong 50,000 ba una bate tangka ra·bitaniko Election Commission champengataha aro election-ni somoio maiba nangchongmota kamrangna bang·bea tangkarangko ra·bitna nanggenchim ong·ode kamni lekkarangko mesokna man·na nanggen ineba District Election Officer u·iataha aro kamni lekkarangko mesokna man·jagenchimode ua tangkarangko Election official-rang rim·gen ine mikrakataniko on·angaha.